Physikalische Chemie

Die füsikalischi Chemii (churz: PC) isch näben dr anorganische und dr organische Chemii äins vo de „klassische“ Däilgebiet vo dr Chemii. Si behandelt dr Gränzberiich zwüsche dr Füsik und dr Chemii, bsundrigs d Aawändig vo Methode vo dr Füsik uf Objekt vo dr Chemiu. Wääred in dr Preparative Chemii mä sich vor allem für d Methodik vo dr chemische Sünthese vo bekannte und nöije Substanze intressiert, brobiert die füsikalischi Chemii mit Hilf vo theoretische und experimentelle Methode d Äigeschafte vo Stoff und deren iiri Umwandlig z beschriibe. S Ziil isch s, für alli relewante Vorgäng allgemäin gültigi mathematischi Formle mit klar definierte Äihäite und exakte Zaalewärt ufzstelle.

Es isch natüürlig ass si seer nooch zur Füsik stoot, bsundrigs zur Molekülfüsik, und vilmol cha mä e Forschigsthema nid äidütig zur „Füsik“ oder „Chemii“ zelle. Drotzdäm wird zum Däil je nochdäm, wo dr Schwerpunkt gsetzt wird, zwüsche füsikalischer Chemii und chemischer Füsik underschiide. Die füsikalischi Chemii liiferet die theoretische Grundlage für die technischi Chemii und d Verfaarenstechnik. Chemiker, wo vor allem im Beriich vo dr füsikalische Chemii schaffe, wärde as Füsikochemiker bezäichnet. Die füsikalischi Chemii ghört zum Pflichtdäil in jedem Chemiistudium.